竹園海鮮飯店 (已搬遷) 新店位置

今晚經理請食飯，上個月尾食過尖沙咀分店，今次試下上環呢間比拼下，七人叫了五餸一湯，碗湯重係大大碗，果然係識人好過識字，個湯係章魚蓮藕煲豬腩肉，其它餸有咕噜肉，大大隻贵妃蚌，配上粉絲和大量蒜蓉，又香又爽甜，要用上刀义來享用，上魚之前有個清湯薯卜坑腩煲，夠腍，和粥水浸莧菜，這個好有心思，掛住食，忘了影相；到上魚啦！斤零重瓜子斑，蒸得火喉剛剛好，係沙皮，條魚咁好味最後就梗係得返副骨啦！有甜品送，分别有芒果布甸，楊支甘露和薑汁湯丸。今晚整體食物味道都好好，平均每人400有找，抵食過老尖好多，尖沙咀分店差幾班，可能専做遊客關係，没放本地客在心；多謝餐廳嗰位經理安排今晚菜式和份量，剛剛好又没浪费。