Wheatfield X 羅宋湯專門店 (已結業)

大半年前已經發現有呢間羅宋湯專門店晌公司附近，但諗住好似一般茶餐廳既質素，茄膏水加兩粒西芹三粒紅蘿蔔溶哂既薯仔同埋鞋到痴牙既牛腩粒仔，所以就算我超鍾意飲羅宋湯都無衝動去試。直到今日lunch time既時候，睇吓 open rice搵靈感，居然見到呢間店評價頗高喎～！好！就俾次機會試試佢～！由order 到拎走，只係三分鐘左右，可能因為過咗 2pm 店內得一個食客，所以極度快手。外賣 packing非常企理，返到office 一打開個蓋以為阿姐唔記得放湯所以咁快手，點知睇真d，有個貼心位～原來外賣盒分咗上下兩層，我 order牛腩羅宋湯配螺絲粉，上層膠兜放粉，下層放湯，唔怕浸冧哂d粉，一撈個湯，omg, 有成5，6舊大大舊既牛腩，仲要煲得好冧，個湯非常濃郁，但如果平時食開清淡可能會嫌佢咸，我重口味之人覺得正喎～！另外檸檬茶個茶底都 ok, 唔苦澀～店內乾淨企理，整體有85分，係會回頭既食店。