小神燈新派飯館 (已結業)

朋友搬屋邀請我過去參觀，夜晚順帶我去＂小神燈＂食飯。小神燈新派飯館以香港獨有的大排檔作靈感，主打傳統工藝粵菜精髓。入到去已經俾佢嘅環境所吸引，裝潢上配搭鐵皮攤檔、街市吊燈以及電車卡位區等，打造老香港情懷，就連茶壺、熱水壺都充滿兒時嘅回憶！黎到見到佢個一周年晚餐菜單，款款海鮮特別吸引，而且Menu令人眼花撩亂。先來個爆膏奶油蝦，入口有濃郁嘅奶油香味，真係隻隻爆膏，蝦肉爽口彈牙。再來個屋企比較少煮嘅椒鹽瀨尿蝦，一上台即刻聞到好香嘅炸蒜味，肉質鮮甜微辣，好鬼惹味，送生啤一流！朋友就揀咗金沙鬼馬百花釀油條，呢款小食係用上鹹蛋黃，釀入蝦滑同埋油炸鬼製作而成，口感豐富多層次，非常香口。最後一款海鮮揀咗沙薑焗海花螺，花螺鮮甜爽口，入口無沙，沙薑味濃，值得推薦俾各位！食咗咁多惹味餸，飯桶都係要叫返個哈哈大笑炒飯！米飯粒粒金黃，炒得好香好有鑊氣，加入咗翠玉瓜、大蝦、櫻花蝦乾，整個份量適合三個人分享添。