齊柏林熱狗店 (錦薈坊)

營業中

休息中

想食佢哋嘅熱狗好耐，但好多時都係晏晝，想搵個坐得低嘅地方。呢晚放工要去市中心買啲嘢，就買隻熱狗做晚餐。睇餐牌見到款式唔少，我嘅選擇困難症又發作。見澳式風情熱狗係Best Seller，芝士、菠蘿、煙肉都啱食，就叫咗呢個，另加$15轉套餐，點咗細薯條加罐裝Zero。睇到個廚房，所有柯打都係即叫即整嘅。薯條即炸，連條腸都係落咗單先開始煎，加上客人唔少，所以等得比較耐先有得攞。搭埋車返屋企，打開嗰陣個熱狗同薯條凍咗了，但正正咁更加見真章。熱狗包邊仍然脆，入面都仲係軟嘅，唔係焾咗嗰種，而係似日式麵包嗰種軟。睇海報話佢哋啲包唔係攞貨，而係自設工場整。薯條係脆得嚟唔硬嗰隻。雖然話薯條係攞貨，但攞邊隻貨、會唔會炸過頭唔夠身就有關了。呢個我覺得都幾好食，如果有其他特色醬應該更好食。有機會要再試吓。