金所 (已結業)

之前一直想試金所，最近知道佢喺中環開舖，即管去試。12:30pm左右去到，喺門口排隊排半個鐘左右就有得入座。入座前侍應話餐牌上1號至8號已經賣晒，所以我就揀咗最貴嘅丼，因為我想試齊中拖羅同大拖羅。落單要自己去收銀比現金，等咗10分鐘左右就有飯食。刺身色澤好靚，入口好滑好好味。壽司飯係微溫，比較黏。刺身豉油俾得好少，不過我冇問有冇得俾多啲。其實我都想試埋海膽同三文魚子，希望下次早少少去到有多啲餐可以揀。