醉串 (已結業)

有今日老公要翻工，仲要翻全日，午餐就要食自己，自己搵食。約左朋友三點係銅鑼灣行街，就自己早少少過左海搵食先。行呀行，去到一蘭個頭，見到勁多人，行前少少見到有間叫醉串，lunch有石鍋烏冬食，望入去又見d位好舒服咁，就入去試試佢啦。午市優惠推介，有八個選擇，價錢由$58-$78，再另收加一服務費。我叫左個極上黑豚肉石鍋烏冬配黑豚豬骨湯底。湯底都有四個選擇呀，可以因應個人喜好去配配呀。個餐仲跟咖啡或茶，天氣咁熱，我當然加錢轉罐可樂黎消消暑。等左一陣，烏冬黎到先嚐一口湯底，豬骨味香濃，濃度適中，唔會太咸。而個黑豚肉同洋蔥一齊炒過，好香，豚肉都好嫩滑又唔會好肥，仲吸左湯底既味，配菜都有好多，有粟米粒，蛋，木耳絲，金菇，翠翠苗，分量十足。烏冬好彈牙，有咬口，仲吸晒湯底既香味，好正呀。四個人黎食仲有九折，下次搵多d人黎食先得。其實以呢個價錢黎講，無折都食得過。職員都好有禮貌，成日加水，唔駛自己出聲叫。