泰馨 (已結業)

男朋友帶我黎食隱世泰菜，洪水橋落車，要行一段黑麻麻嘅路，沿途咩都無，呢啲環境唔會令人覺得有餐廳，黎到門口，似民居，無明顯招牌，好神祕咁。餐牌上有中文泰文，但無價錢，不過據說唔太貴，鍾意食咩就揀咩啦。夜晚8點半黎到，已經無扇貝同蜆，剩返蝦，叫左咖哩粉絲蝦，咖哩粉絲有啲蛋絲，好香唔太辣，個味道真係無得頂，淨食粉絲無餸都無問題！蝦就普普通通啦，無咩鮮味但唔算太差。泰式炒雜菜，相對比較淡味，個汁就甜甜地，芥蘭有啲苦，椰菜就爽甜。濕炒貴刁，個樣就似濕炒河，不過貴刁變左長塊嘅粉，啲粉有少少焦燶味，瘦肉幾粗糙，好似煲完湯咁，其他料就同上面碟雜菜差唔多，味濃過雜菜。兩個人食左二百五，比想像中平，最好食咖哩粉絲，其餘兩樣普通。