至尊滿屋日本料理 (已結業)

難得今日早收工，約左朋友去旺角瓊華中心的至尊滿屋日本料理食放題。呢間日本放題都算多野食揀，選擇拍得住大喜屋。事不宜遲，食左刺身先講。呢到既刺身味道不過不失，每次都跟足落單紙既數量上菜（抵讚！），魚類刺身比一般放題店厚身兩倍，真材實料。另外除左甜蝦，呢到重有大蝦刺身，平時無咩機會食到！熱食方面，推介雞翼、牛舌，俾平日食既放題店出色得多。最後重有十款雪糕以供選擇，包括 Movenpick 同Haagen Dazs，加上店員個個服務態度良好，上菜快，份量準，$200左右一餐既放題算係令人滿意。