韓米Miso (啟田市場) (已結業)

一向都知道藍田啟田商場街市外面有好多小食外賣店，今次經過見到有間食韓國食品嘅叫韓米Miso，從menu上睇到有飯類便當、紫菜卷飯、炸雞同埋一d韓國小食等等。今次叫咗韓式豬肉飯 、韓米炸雞套餐C餐，飲品揀咗韓國雪梨水同埋粒粒提子汁。首先先講個炸雞套餐，入面係原隻雞分2邊炸，隻雞超大隻超juicy，入面有濃濃嘅雞汁，外面就炸得甘香可口，絕對係可以用外脆內軟嚟形容，出面扑扑脆，入面雞肉就超嫩滑，絕對值得推介而且非常抵食，仲有粗身嘅薯條，點埋茄汁食，食到好滿足，絕對值得推介。另外豬肉飯係用韓式煮法，豬肉超入味，另外飯旁邊就有紫菜絲及蛋絲，撈埋飯及豬肉食每一啖都有唔同嘅口感。雪梨水及提子汁就唔係有好多地方可以買到，雪梨水可以解渴解熱，粒粒提子汁就有超多果肉，正！