Sweetology (已結業)

好少黎又一城，但朋友想過黎行下行睇下戲所以過黎行下。行到咁上下有d肚餓。唔想食飯，揀左溜冰場隔離嘅sweetology，餐廳以白色為主，裝修精緻，感覺舒服。揀左經典原味可麗餅。等左有少少耐，好彩未肚餓。朋友鐘意食脆卜卜嘅可麗餅好味D，但我覺得呢個淋身嘅可麗餅配半熟蛋黃、火腿、杏仁、芝士碎都幾好味。咸咸地，杏仁脆卜卜，口感豐富。經典原味可麗餅免費送柚子冰紅茶。無乜冰紅茶味道，但柚子味濃，飲到底都唔覺淡。巴馬火腿窩夫有兩塊鬆軟窩夫，加上cream cheese無咁單調。窩夫上嘅巴馬火腿，一塊炸過，比較咸，似煙肉。另一塊正常，好味好多。中間嘅沙律菜好新鮮。食到一半，薯條黎到，趁熱食最好味。最後點少得甜品，揀左夏洛特伯爵茶提拉米蘇。手指餅應該係浸過伯爵茶，但食唔到伯爵茶嘅味。Tiramisu唔太甜，食哂成個都唔覺得膩。埋單每人$115，抵食，兩個人都食到好飽好滿足。如果店員可以細心少少，例如幫客人收碟，換下甜品碟就會更好。