La Serene Caffè

營業中

休息中

今日妹子相約收工去逛街，行咗入崇光以為睇化妝品，原來佢想買支靚啲嘅筆啫，佢帶我行去YSL旁邊搭𨋢，直接到達位於11樓嘅書店，樓層有個賣原子筆嘅專櫃，買到心頭好就順便食埋飯。近期都好少到崇光逛街，剛發現呢間餐廳景觀幾正，店內木系裝潢雅緻，感覺閑逸舒適。侍應殷勤送上餐牌同開水，我食完下午茶無耐未肚餓，叫咗一個主菜，一個天使麵，主菜加$45配埋餐湯+咖啡 。餐湯係意大利菜湯，妹子話菜湯香濃好飲。麵包溫暖鬆軟有牛油香。煎銀雪魚柳擺盤精緻，配菜新鮮，種類豐富，有椰菜花、西蘭花、翡翠豆苗、翠玉瓜、四季豆、紅蘿蔔、薯仔。銀雪魚皮脆肉滑，油脂豐富甘香，點埋檸檬柚子醋汁，好味又解膩，正！蒜香帶子黑魚子天使麵天使麵賣相非常吸引，特別係面頭嘅黑魚子。除咗天使麵同黑魚籽，仲有帶子、新鮮蘑菇、洋蔥、翡翠豆苗、車厘茄。帶子兩面輕煎過，肉質保持爽口鮮甜，天使麵爽身又幼滑，配埋黑魚子嘅鹹香，鮮香惹味，好食呀。唔少得要叫一客甜品，日式芝士蛋糕係凍食嚟，芝味香濃，口感不錯，伴碟嘅果仁朱古力都好食。萊斯金牌咖啡，啡味香濃，口感順滑。好開心發掘到一個見客好地方。