翠華餐廳 (已結業)

今次同朋友去九龍灣海濱公園，之後去咗海濱匯2樓嘅翠華餐廳食飯，依度環境好大而且裝修好靚，仲有好多落地玻璃睇到外面嘅靚景。今次叫咗香煎T骨牛扒、韓式溫泉蛋牛肉石鍋飯、豚肉炒粉絲、藍豆花檸檬茶、柚子檸檬梳打、柚子檸檬茶、黑松露野菌滑蛋牛角包、奶油脆豬及生磨蛋白杏仁茶。香煎T骨牛扒超大塊而且煎得好香口，配菜有烤西蘭花及烤蕃茄，加埋薯條真係好大份及好味。韓式溫泉蛋牛肉石鍋飯超有韓國風味，牛肉加埋溫泉蛋及其他韓國配料及蔬菜，石鍋裏撈飯食，每一啖都有唔同嘅質感及口感。豚肉炒粉絲就用咗韓國傳統做法，韓國粉絲索曬汁嘅味道， 兼好有咬口，豚肉亦都好有韓國嘅醃料味道喺入面。黑松露野菌滑蛋牛角包，黑松露及野菌有好多，而且蛋炒得好滑，夾雜住黑松露野菌及牛角包一齊食，每一口都有唔同嘅質感。奶油脆豬係其中一個翠華招牌菜，豬仔包就外脆內軟，面頭加上鮮奶油份外好味。生磨蛋白杏仁茶係其中一款比較特別嘅熱飲，好啱女士飲用，蛋白加上杏仁特別養顏。藍豆花檸檬茶、柚子檸檬梳打、柚子檸檬茶都好靚，絕對係打卡之選，而且每一杯都清涼解渴。