老地方 (已結業)

Item: 老地方
Rating: 3
Author: 奧志雷

3.5

34 食評

味道

環境

服務

衛生

抵食

301

大埔

$50以下

港式

奧志雷

等級4

2.1K

路過見有位就是但啦，最緊要快唔洗等。都有好幾個月無黎幫襯喇，每次只為熱辣辣明爐車仔麵之麻，我覺得無咩分別。平靚正，快夾爽，簡單好味，飽肚扺食 ﹗ 坐低左一段時間都人理，左望右望、上望下望，有點想離開既衝動，幸好侍應阿姐發現到我，終於走過黎招乎我喇，仲幫我落埋單添，thank you ﹗

之後發現原來依家轉左自助落單，即係要自己寫單再交比職員喎，都幾搞笑喎 ﹗聞所未聞，Good idea ﹗減省人手，其實同車仔麵、酒樓點心剔 order 紙同樣道理，但依家係要續隻字手寫囉。見大部份食客都唔知道要自己寫單，有些食客等得唔耐煩，無侍應招呼落單，黑面氣憤地離開 ﹗

老地方全新 menu 除保留原有佳餚外，還加左好多新菜色添，而且設計精美，美淪美渙。乾乾淨淨，揭多幾頁都唔會抗拒啦。新 menu 比以前企理好多，顏色又鮮豔、乾淨而且包裝精美，真係唔食都睇多兩眼啦。

凍檸樂，突然好想飲，剛做完運動好頸渴呀，飲冰凍汽水就特別爽啦，一次半次唔會肥既 ﹗倒下可樂，聽到冰粒跳舞既聲音，豪氣地大啖一啜，凍到打冷震 ﹗爽爆 ﹗

大去骨白雲鳳爪大辣，食完先知可以 order 細碟。都唔知侍應阿姐有無落錯單，我要大辣但只係微辣乍喎，而且又唔夠酸又唔夠凍涼，涼拌唔凍都唔叫涼拌啦 ﹗鳳爪皮肉均爽脆，不酸不辣又唔入味，仲要溫度跟室溫差不多，味道及香氣即時大打節扣。

泰式小食併盤，大部份為炸及香茅堅熱氣囉，幾乎每次必食，只因無選擇又唔比散叫。香茅雞扒，有驚喜喎 ﹗雞扒最好食，皮脆肉嫩，醃得入味剛剛好，濃郁而不過份，炸得香口，肉汁澎湃夠水潤，好味道。肉汁餵飽每顆味蕾，香口惹味，香茅味道突出而不過份，女友同我一樣咁喜歡，拍晒手掌。

香茅豬扒、炸雞中翼有點失色。香茅豬扒雞中翼一樣偏咸，炸得過火，又乾又鞋，口感乾硬，味道麻麻地，免強入得口，不過乾硬鞋無得救。碳燒豬頸肉，遠近馳名招牌豬頸肉，堅稱自家續塊碳燒 ﹗香甜味美保持高水準，軟棉爽口又多汁。滲著微量肉汁，好味道。醃得入味帶碳燒香，口感嚥韌，鬆軟中帶點趙口及肉汁，皮香肉嫩啖啖肉，大滿足 ﹗真係好味架喎，無搵笨。

招牌豬頸肉真係好好食呢，醃得入味無過咸過嗆，吃得到原汁原味，泛著微微肉汁不太乾，質地腍得黎又不失趙口。依個併盤跟泰式雞醬唔係好夾，可以試試魚露、青檸醬、青瓜汁，較清淡點會更好，成盤炸野已經好油膩啊，滯滯感覺濃厚 ﹗上次女友大讚雞扒好味道 ﹗今次專登黎要添食，但見 menu 無得單叫雞扒，唯有叫併盤囉。點解唔比單叫呢？

蒜蓉炒通菜，黎老地方必食炒菜，真係有鑊氣又鮮爽多汁，撈埋炸蒜蓉同乾蔥頭一齊炒，非常濃郁又香口 ﹗其實我本身想食得清淡少少，清炒時菜都幾好食架 ﹗發覺依度個廚師好鍾意用炸蒜調味，不論湯粉麵、炒飯炒麵、炒菜炸物，都落唔小炸蓉，似乎用得太濫喇。

蒜蓉炒白菜，鮮爽多汁，靚菜有濃厚菜甜味，用金銀蒜及乾蔥頭炒得非常香口又夠鑊氣，手功了得 ﹗一定要大束大束地食先食出精髓，好好食呢 ﹗老地方招牌炒菜無得輸，香氣傳千里，高質時蔬發出天然菜甜味，爽嫩多汁，撈上炸蒜乾蔥更添風味 ﹗而且師傅炒功出眾，時間掌握得游刃有餘，堅好味 ﹗記住趁熱食先食到極致美味 ﹗

蒜蓉炒菜芯，有鑊氣又好味又濃郁、菜芯爽脆多汁香甜味美 ﹗不過味道極濃縮，好快已有點膩滯感覺，蔬菜都係清清地好。女友又要遲半個鐘，我已經勁好肚餓，唯有自己食住菜芯先啦。本來想食清點，叫清炒架，但上次食過麻麻地又炒到燶晒，都係穩陣食蒜蓉算。用炸蒜加乾蔥炒，非常惹味濃郁香口，搭上菜芯清甜多汁充滿大量水份味道剛剛好，好味道 ﹗完全消滅，一條都無剩，食晒 ﹗

冬陰功滑牛火鍋烏冬，以前將所有配料連烏冬放晒係隻鑊度直接送到，一鑊熟。依家轉左用細煲仔，為左慳位？個煲容量應該放到三個烏冬滿滿的。另外將肉、菜、金菇、烏冬分開用碗上。可能唔想因為食客食得慢，怕食物過熟過腍或過硬掛。依家可以比食客自己撰擇食咩先，依個改動都幾好，good ﹗味道、質數都跟以前一模一樣，但價錢加左十幾蚊，份量仲好似少左添。

另類明火車仔麵，多年黎都得到我全力支持 ﹗快狠準、平靚正、好食飽肚、充滿力量 ﹗煲仔細細，但火更細，終於等到佢滾起喇 ﹗將所有豆卜、蘿蔔、竽絲、鮮菇、金菇、滑牛倒晒落去一鑊熟，每樣配料都索湯力出眾，好食好食。

最底係烏冬，跟住成棵生菜，最上面金菇同鮮牛肉，永遠不鞋不韌唔會老既牛肉，因為醃得都幾利害，腍劈劈滑潺潺，味道中規中矩，不過浸上冬陰功湯即時好味左，酸酸辣辣好開胃。滑牛醃過乸過，質地腍得不自然，唯一好處係烚極都唔會變韌變硬囉，索左冬陰功湯既牛肉片好好味呢。生菜、金菇、鮮菇、蘿蔔、豆腐卜、芋絲配上又酸又辣既冬陰功湯，好食到唔停得口 ﹗菜多肉少又健康，生菜金菇爽甜、鮮菇滑滑彈彈又充滿水份。蘿蔔煮透盡索冬陰功湯，一咬爆汁。係龍蝦丸削了一點，好鬼粉。

烏冬要一滾即食，廉價烏冬溶點低，所以要非常留意時間，好易腍到夾唔到架，唔能夠烚太耐架，滾起無耐就要即刻食，連酸辣冬功陰湯一齊掃入口，超正 ﹗我經驗老到，好少會失手既，不過今次唔覺意煮耐左添，溶左少少，有點粉口啊 ﹗大力少少夾都爛，口感腍劈劈，sorry sorry。每條烏冬已經吸盡所有配料精華、香辣冬陰功，浸得完全透徹，每口恰似飲湯一樣，好好味 ﹗

冬陰功肥牛火鍋烏冬，次次都係酸辣冬陰功，好鬼悶呢 ﹗好想食咖喱湯底，多年前食過咖哩係比冬陰功更辣架 ﹗但居然取消左？非常失望，點解要取消美味咖哩湯底喎，您地都係用咖哩膽開之麻，咖哩飯、撈丁麵都會用到啦。

普通平價肥牛，烚完吸收左冬陰功既精華又幾好味喎，無想像中那麼肥，部份脂肪已灼走左，而且脂肪位十分爽脆呢。雖然瘦肉有點鞋鞋地，不過肉味都幾濃架喎，滿意。上次試左滑牛，醃得太利害，乸到腍劈劈。今次試肥牛啦，我最初想要咖喱湯底架，覺得佢應該比冬陰功更辣，但女友堅持冬陰功呢，無所謂。

以前係用鑊載晒湯及生料送到，開火一鑊熟架，依家轉左用細煲，生料分開上，要續少續少烚黎食呢。有菜、菇、豆腐、芋絲、豆腐卜，全部都係索汁索湯高手，每一啖都充滿濃郁酸辣冬陰功湯，好味啊 ﹗依個火鍋健康得黎又非常好食，六十蚊左右價錢黎講，抵食 ﹗

烏冬雖然係平價貨色，烚得恰當再加上酸辣冬陰功湯都可以好好食架。烏冬滑嘟嘟又有點咬口難得幾滑架喎，大滾將烏冬烚開就差不多食得架喇，再烚就會溶到夾唔到。冬陰功湯已集齊肉味菜味菇味，味道十分豐富香甜，湧著烏冬一齊倒晒落肚，非常美味。先烚晒生料餚個靚湯底，最後才解決個烏冬。椰菜？比生菜我好過啦。

肥牛、什菇、什丸一鑊熟，肥牛雖偏瘦，幸好味濃有嚼勁。其他配料均屬大路平平，志在為湯底添味。酸辣冬陰湯加入牛肉味、什菜味、什菇味，令都味道更多恣多采，讓烏冬索滿湯汁齊齊倒入口，香濃味美加上烏冬滑溜非常，好味到震 ﹗全部食得乾乾淨淨，湯都無得剩。