源汁源味 (已結業)

因為受到尖沙咀新記餐廳麻麻地又貴既芝士撈丁既影響，所以遲遲都唔肯黎源汁源味試，不過今日心血來潮黎一探究竟，單拖睇睇咩料先。發現有兩個舖位喎，一個對住外街連廚房，另一個係商場裡面無咩裝修，放滿細細張既枱櫈。雞扒芝士撈出前一丁，有驚喜喎 ﹗居然比起名牌新記餐廳好食百倍呢。芝士汁夠濃夠厚又熱辣辣，份量足夠撈晒整個出前一丁麵添，仲有得揀大麵或細麵，麵質軟硬適中唔會太腍，掛起大量凶湧芝士漿捲住入口，黏黏的芝士味道濃厚，香甜味美，好滿意。煎雞扒醃得偏咸左少少，味道都可以，芝士連麵連雞一齊食可減輕咸度。雖然叫外賣自取送汽水，但始終堂食先最好味 ﹗