越華會海鮮小館 (已搬遷) 新店位置

靚靚媽咪不但係一個標準電視迷，而且仲係Bobby哥o既忠實粉絲，所以近幾個星期都喺度狂追睇「老友記」 。週末播完大結局，見屋企人都仲講緊套劇，XO仔就建議大食會去Bobby哥有份開嗰間「越華會海鮮小館」度開餐。由於餐店就喺公司附近，小肥收咗工可以直接行過去，故亦專登訂食六點半。去到門口先知原來食店只開晚市，彷彿專為夜鬼而設。門外o既廣告牌所示，「越華會」乃得奬熱店 ，招牌菜式以海鮮為主。食店佔用面積兩層，由正門入可乘搭私家升降機直達二樓o既大廳散座，或三樓o既廂房。二樓近窗一排卡位，六點半未到已坐滿食客；中央o既大、中、小圓枱七點亦滿座，似乎餐廳同老闆之一o既Bobby哥一樣都係咁受歡迎喎 。廚房旁邊有幾個魚缸，可見多隻巨蟹同龍蝦喺度游水，缸頂o既招牌仲有兩隻可愛o既龍蝦氣球點綴，主打菜式明顯係蟹同龍蝦。人未到齊，長輩都話要飲啤酒解解渴，消消暑，點知店子只售細樽裝啤酒，又唔係幾夠凍 ，所以飲得唔係幾夠痛快。大食會各人都係因老友記效應，方才首次光顧「越華會」，點餸好自然地亦從兩頁「廚師推介」著手。點好菜，姐姐仔先派發濕紙巾。嘻嘻，濕紙巾上個廚師嘜頭望落真係好似Bobby哥喎 。