日月星快餐 (已結業)

有左好多年的老牌快餐店，朋友一直都話要黎食佢個炸髀，今日見順路就會一會佢啦。門面非常傳統，沒有華麗嘅打卡點，但感覺實際。主打外賣，但有需要都可以開張折枱堂食。店內有滿滿的餐牌，價錢相當親民，其中最多人叫就係呢個熱賣星期套餐，幾乎個個黎到都係叫炒貴刁。到左下午茶時段，就係炸髀同雞扒包熱賣啦。叫左一份A2同一份A7下午茶，加埋凍飲都係67蚊，抵！炸雞髀+腿治即叫即炸香噴噴，無轉珍寶髀但都唔細隻㗎，炸得皮脆肉嫩唔乾身，仲一啲都唔油膩，簡單調味已經好好食，店家仲貼心地附上手套一隻，拎住隻髀黎咬正呀！意外地炸髀居然唔係配薯條，而係腿治，麵包鬆軟，塗滿厚厚的牛油好香啊。吉列魚火腿+沙律魚柳同樣即叫即炸，香脆得黎粉漿唔厚，魚肉嫩滑勁好食。沙律係薯仔雜果沙律，沙律醬調得香甜，又無出水，高水準之作，而家雜果沙律買少見少啦。凍檸茶&凍奶茶凍飲都係加兩蚊咋，仲超大杯！凍檸茶走甜都無混濁，個茶底仲可以咁清，勁喎！茶香檸香，好飲。凍奶茶都好正，奶滑加上比例剛好，又唔過甜，讚呀～又平又好食，唔怪之得排晒隊等外賣。