手作餃子專門店 (荔枝角道) (已結業)

發覺太子有好多間主打食餃子嘅麵店，今次就嚟試下呢間手作餃子。舖頭面積細同狹窄，客人坐得迫，冷氣亦都唔係好夠。舖頭提供嘅餃子款式都幾多，除左常見嘅韮菜同白菜豬肉外，仲有豬肉芝士、冬陰公、日式紫菜同薯仔雞肉等等比較新穎嘅餃子，今次我地就叫左雜錦湯餃套餐A同B，另加8蚊叫埋上海麵底。餐廳標榜湯餃嘅湯底喺老火湯，用上淮山花膠同豬骨嚟煲。一試之下味道清甜唔油膩，飲得出淡淡淮山味，仲有紅蘿蔔、豬骨同黃豆湯渣，成碗飲哂都唔口渴。上海麵麵質爽硬但無咩麵粉香味，味道比較普通。餃子每隻都包到脹卜卜，落足料去整，而且餃子皮薄所以隱約會透到入面餡料嘅顏色。韮菜豬肉餃嘅韮菜比例幾多，豬肉餡味道也不錯。薯仔雞肉餃入面以薯仔為主，雞肉份量偏少，味道似我地平時屋企食開嘅咖哩薯仔炆雞翼。而我最鍾意嘅就係日式紫菜餃同豬肉芝士餃，紫菜餃食落有濃濃海水咸香味，而豬肉餃嘅芝士味比想像中重，味道唔錯。食完7隻餃子加麵底已經好飽，下次諗唔到食咩都可以嚟呢到食抵食又大隻嘅水餃。