唯珍上海麵家 (已結業)

多年來，去三代佳佳食糖水（註：現店同兩間舊鋪都開喺呢頭）成日經過，諗住呢間老牌小店屹立多年應該不錯，點知中伏。後來回想，可能小店生存之道在於價錢平，舊區街坊食開有感情。雲吞無錫排骨麵 加 雪菜 ($45)雲吞，皮明顯太厚，餡料太少，食唔出白菜鮮甜。麵，大大碗，麵質偏淋。雪菜，唔夠咸香，唔夠鮮嫩，比較偏向似茶記雪菜肉絲米嗰種，而唔係正統上海麵家。無錫排骨，偏瘦偏硬，沒有油香。公道說話，真係好抵食，咁先$45。不過下次食上海麵，都係返美孚滄浪亭穩陣啲。