滷府 (已結業)

話說今日係公司太忙，做到食飯時間到都未搞掂晒，急急腳買個外賣飯盒先。落到樓下，經過一檔裝修精緻的餐廳，仔細一睇原來賣滷水食物外賣！店名仲好得意叫滷府，仲用老虎🐯圖案做招牌，新派又有特式！真係好耐無食過滷味，回想小時候，爸媽每去潮洲餐館，一定會叫滷水鵝片，仲有滷水豆腐墊底，諗起都流口水。即刻決定食呢間外賣，叫慢煮滷水鵝片飯，再加兩個滷水蛋同千層腐皮，返公司慢慢嘆！打開飯盒一望，份量好充足，更附上滷水蛋同滷水千層腐皮做配菜， 仲包一杯熱飲，我本身驚唔夠飽，仲特登嗌多左蛋同腐皮添 ，今次應該食唔晒嘞，晚餐有餸加了。太耐無食滷味，但又怕食唔晒，小小地試滷水蛋同千層腐皮。鵝片好夠味，加埋有少少肥既鵝皮，肉香油香互相輝影，齒頰留香，點上附送的蒜泥醋，更加開胃好送飯。 不得不讚，滷水做得有層次，花椒八角味好出，滷既時間好足夠，唔會淨係得咸味無香味，所以蛋同千層腐皮都好好味。 好鍾意千層腐皮，一層包一層，爽口得黎又有香濃滷水味同豆香味，唔錯！今次午餐唔敢叫拼盤，怕食唔晒，試佢既小食為主，試過今次之後，下次我要買成隻滷水鵝返屋企加餸先得！