老鍋台式火鍋 (京都廣場) (已結業)

星期日唔想煮飯，去左銅鑼灣駱克道既老鍋台式火鍋打邊爐。餐廳位置方便，係銅鑼灣地鐵站出口對面。今日食2人套餐，價錢$405。2人套餐包湯底二選一，可揀老鍋秘製麻辣鍋或老饕酸菜白肉鍋。今日叫左老朋友老饕酸菜白肉鍋，主角極品豬王花腩豬味濃，脆脆哋又煙韌。另一主角醃制東方大白菜就酸甜爽脆。湯底少少辣又酸酸地，好開胃。另配大量滑溜寬粉條同大量蔬菜如冬菇，蕃茄，粟米，同蔥。套餐包精選肉類三選一，有牛，豬同雞揀。我哋揀左嘉美農場雞肉，一大碟份量唔少，超嫩滑食落又爽爽脆脆咁，好正，仲全部去哂皮。伴碟嘅梛菜絲都食得。套餐包丸餃拼盤，有彈牙同味道天然既墨魚丸同香菇貢丸，個皮超煙韌既肥美魚皮餃同蛋皮好簿既台灣蛋餃。每樣各兩粒。套餐包五彩鮮蔬盤（細），雖然唔係真係五彩，不過都有油墨菜，生菜，娃娃菜，金菇同兩大粒鮮冬菇。質素唔錯。最後仲有麵食類，可選米線或白飯，我地例牌揀左米線。米線份量正常，好幼身，吸左個湯好好味道。自己去自助調料吧攞調味料。今餐所有食物質素都好好，坐得舒服又静局。