合時小廚 (裝修中)

老闆請食飯，有同事介紹合時小廚，一行6人就黎試吓。同事話呢間野日日都咁多人，已經一個月前訂位，但都俾另一班人攞咗張大圓枱，因為人地有8個人。去到坐底，地方淺窄，坐底就唔可以再郁，唔係會撞到後面張櫈。點咗幾樣推介菜式，先來蓮藕餅。蓮藕餅非常香脆，用料十足。啖啖肉，除咗蓮藕仲有葱同埋爽口嘅粒粒，口感正，味道好。唯獨有d熱氣，要飲返d酒清吓熱。再來係蝦多士，好大件，夾一件，已經填滿隻碗，炸到金黃色，香脆可口，而且非常厚蝦肉，堅係俾足料，厚厚蝦肉下面仲有隻蝦，喜歡食蝦嘅朋友唔好錯過不過食完一件就飽咗一半～跟住係古撈肉，聽聞係用五花腩包住舊肉嚟整，食落又真係唔同d喎，係好厚肉嘅質感，唔係一般厚炸粉嘅古撈肉，唔錯。金銀蛋香菜，同一般冇乜分別，味道較濃。蒸蟹飯，呢個堅係正，未食蟹，淨食啖飯，撈埋d汁，已經好正，飽咗都想再食，蟹本身亦有膏，好味。炸子雞，皮脆肉嫩，冇得挑剔。最後有糖水，係南瓜芋頭西米，好香，唔會好甜，係好味嘅甜品。呢餐食得飽飽，好滿足。