亮燈粥店 (已結業)

聖誕節嘅美食旅程，要待到新一年才發佈，手腳有點兒慢，新一年希望有更多時間及資源去享受美食。言歸正傳，是日趁假期，便與太座到筲箕灣一帶，為新居辦點貨。經過幾天嘅辛勞，加上沒有湯水滋潤，虛火上升，人也躁熱起來。故特地來一客下火粥，為當晚嘅聖誕大餐作前奏。東大街一帶食肆林立，但要搵一間粥麵舖都唔係咁容易。終於見到呢間「亮燈」，名字幾特別，又是舊裝修，看上去好似幾穩健。要下火，最好的就梗係一碗皮蛋瘦肉粥。粥料不太多，粥身不太濃稠，瘦肉是略略醃過的，帶一點鹹味，下火是不錯的。一碗粥，又豈能填充筆者嘅肚呢！先來一客炒麵，材料都撈得幾勻，可惜食落是凍的，而且麵條本身已經開始有倒汗水，有點濕漉漉，當然口感不會爽韌得去那裡了。最後是一碟炸兩，腸粉厚身，不屬佳品；油條本身質量是不俗的，食落有質感，不是一味追求香脆，弄得油條輕飄飄的。可惜得很，炸兩本身唔熱，成為一大敗筆！簡單嘅下火餐，每人盛惠廿一蚊。想給一個笑臉，但食物溫度這麼重要嘅一環也忽視了，故並未能讓筆者一笑。