New Istanbul Kebab

營業中

休息中

香港嘅平安夜當然要去尖沙咀先夠平安。11點喺碼頭走，行返呢頭驚覺啲餐廳收得七七八八，唔想太頹食魚蛋粉，又搵唔到心水，行到就嚟餓暈，求其衝咗入嚟。餐廳喺路口位，雖然面積唔大，但都幾開揚。由裝修，到餐牌，以至店員，都好有中東味道。餐牌嘅中文全部差唔多，飯類大致$80以上，驟眼睇都係轉轉肉同轉轉肉，唔識分嘅應該幾難揀。pizza同卷都有好多選擇，仲有啲幾特別嘅甜品同飲品。Iskender kebab醬汁係西班牙風嘅肉醬芝士，芝士平均地融咗喺飯上面，再鋪上一層醬，每啖飯都非常滋味。更驚奇嘅係呢個多利亞style嘅飯上面係有中東風味嘅炭火烤肉，一啖擺入口，好有層次，令人欲罷不能，味蕾都出走埋。Mixed doner轉轉肉大雜燴。雖然一個飯$98一啲都唔平，但啲轉轉肉份量十足，加上係清真肉，其實值回票價。配搭略嫌太乾，稍一不慎就畀啲肉𠝹親咀，建議怒落醬汁餸飯。叫做連埋前菜同甜品（春卷、薯條同布丁），埋單$292 for 2，可能係最抵食嘅聖誕大餐。餐廳24小時營業，無論幾時行過都係肚餓救星。