沐浴咖啡 (已結業)

濕地公園附近都有好多餐廳，有朋友最近搬左過黎，難得聚舊，想搵間坐得舒服同有特色嘅餐廳。不久之前黎過「沐浴咖啡」，見佢環境同食物都唔錯，就打算黎呢度食下野傾下計。由於有下場，所以都唔想叫太多野食，見到餐牌上有個「法國檸檬麥多士」系列，真係適合想食輕食嘅我地。呢個系列有三個選擇，我地叫左較輕盈嘅「慢煮雞胸肉配牛油果法國黑麥多士」。黑麥多士煎至金黃色後表面香脆，內裡柔軟，上面放上芝士、沙律菜，雞胸肉同埋牛油果，再灑上少量七味粉調味，再以沙律菜伴碟。雞胸肉經慢煮後鮮嫩多汁，配埋香滑細緻嘅牛油果，以及鬆脆嘅黑麥多士，整體配搭唔錯，令人一試難忘。飲品方面，最值得一讚嘅係佢地嘅抹茶牛奶，送上檯時極有驚喜，靚靚嘅拉花配上香滑得黎又有香濃抹茶味嘅抹茶牛奶，令我地度過左一個難忘嘅下午。