Deer Kitchen (已搬遷) 新店位置

聖誕臨近，當然係搵朋友聚下舊嘅好時機。今晚揀咗去觀塘工廈嘅一間餐廳 - Deer Kitchen。今晚我地揀咗1)秘製虎蝦天使麵(2)香煎比目魚配龍蝦(Set)(3)手制意大利雲吞(Set)點完餐後，先送上香草麵包配黑松露牛油，麵包嘅香草味同黑松露牛油嘅香味撲鼻而來，食落去香草包同牛油平衡得啱啱好，無搶到對方嘅味道。今日嘅餐湯係南瓜湯，南瓜味好香，不過如果可以濃多少少就好喇。其實跟Set嘅餐前小食有幾款，店員推介手制意大利雲吞，咁我地就揀依個啦。依個意大利雲吞係配黑松露醬汁，兩樣非常夾，不過兩隻雲吞痴得太實，要有啲時間同技巧先分開到。秘制虎蝦天使麵嘅醬汁係有少少辣嘅，好惹味，朋友好喜歡依個味道，如果可以多少少汁就更加好喇。而隻虎蝦烤到啱啱好，肉質都幾彈牙。香煎比目魚配龍蝦，份量都算好大份，龍蝦有成隻手掌咁大，不但啖啖肉，而且用咗芝士去焗，就更加美味。比目魚煎得好好，非常嫩滑。配菜有紫蕃薯蓉，甜甜哋，我好喜歡啊。甜品有白酒啫喱同朱古力慕絲，不錯。餐廳佈置得好溫馨和諧，作為一個聚舊嘅地方，係一個好好嘅選擇。