拳王泰國餐廳 (已結業)

泰拳貴為泰國嘅國粹，當功夫同足球都俾人諗到出黎既時候，點解無人將泰菜同泰拳擺埋一齊呢，作為業界既翹楚，泰菜同泰拳，有得諗喎..蝦片脆到不能 係一個好好嘅前菜首先嚟嘅係生蝦刺身，蝦身勁大隻，我夠膽講佢係我喺香港境內食過嘅泰國菜之中最大隻嘅，個生蝦汁酸酸甜甜，連埋塊辣椒片同蒜片同埋舊生蝦一齊食勁開胃。香辣蟹肉夜明珠，個名起得好靚啊，明珠即係荔枝，起核後用佢黎包住一啲拆好嘅蟹肉，面頭再加少少香料，蟹肉嘅鮮加埋荔枝嘅甜，真係一個好好味嘅冷盤。海南雞，呢間餐廳個海南雞好特別，將雞擺係個蒸籠入面，底下有個碗逗住，上枱嘅時候侍應姐姐就會喺個雞上面淋上餐廳既秘製雞湯，呢個食法有別於其他泰國餐廳凍，係一個熱食嘅海南雞，海南雞嘅雞肉勁嫩滑，我最鍾意點嗰個甜甜地，黑媽媽既醬油膏。香葉肉碎炒飯，炒飯炒得乾身，份量勁豐富，九層塔同肉碎配合得啱啱好，飯嘅面頭蓋上一隻蛋，仲係半生熟㗎，中碎個蛋，流啲蛋汁出嚟撈埋個炒飯就無得頂喇。