漢堡B (已結業)

朝早落咗遊輪碼頭走走，下午出番九龍灣又諗起佢，到達後目測無之前咁多人排隊等食，得少貓三四隻。我就叫咗個好似叫珍寶漢堡 應該收咗HKD70，包薯角同一罐氣水，再等佢地製作五分鐘頭有得食。漢堡真係好大咪，真係好珍寶！裡面尐料應該有牛肉，脆煙肉，蛋，菠蘿同埋沙律菜。首先係用手持 呢個方法黎食，第一口咬落去跟本食唔到漢堡嗰橫切面，到第二口咬諗住同呢隻漢堡博命，係咬得出一個唔太完整嘅橫切面，但個死人咀角差不多裂開，而漢堡內嘅醬汁搞到兩隻手都係，狼貝非常！最後反而用刀叉食呢個漢堡會方便尐！賽後檢討有二：第一，汁，點解今日個牛係無乜肉汁而只得醬汁？無肉汁之餘仲要鞋口，咁同食麥當當有乜分別，希望佢地係一時失手。第二，漢堡包太大，大個尐個買相係好好睇，但真係擺唔到落口，唔好話去嘆去享受。食一個漢堡包係其實可以好簡單，唔應該要舞刀弄劍咁黎食個漢堡，我諗唔到係呢個牛下嘅商場裡面，隔離舖仲賣緊臭豆腐 呢尐貼地小食，而我就懶有型同優雅咁，揸住對「膠」刀叉係度据漢堡，而當時對面嘅食客就督緊腸粉燒賣食，都不知幾能中西合璧同幾九唔搭八。