炑八韓烤 (瓊華中心) (已結業)

生日月去炑八韓烤有著數，晚市最低消費兩碟燒烤食品或一個套餐，再加預先一日book位會有個肉肉蛋糕送!!炑八厚切五花腩，非常推薦因為店員會幫忙燒，而且燒得好好!!! 燒完好似食緊乳豬咁。超厚肥瘦又適中，皮脆脆的，店員介紹我地包生菜食可解膩感。韓國醬油蝦配紫菜飯，有4隻，所以我地每人兩隻，一隻試生食，一隻燒黎食。好少可生食，韓國醬油生醃的確鮮味同醬油味十足，亦夠彈牙啖啖肉，燒既話就拆殼後再沾返個醬油汁食，兩者同樣美味。韓式肉肉蛋糕比起甜品既蛋糕更有氣氛。用肥牛舖成、再加牛五花、豬頸肉捲成玫瑰花，好有創意，大家都食到好開心。蒜油蜜糖雞腿肉嫩滑有蒜油蜜糖汁更顯香甜。不得不提，店員好主動，會不時幫我地換網，又會幫我地加爐邊既泡菜蛋同芝士栗米，小前菜同生菜。韓國薄脆牛角酥，牛角酥變成了扁扁既薄脆，加埋朱古力雪糕好夾好好味，另外配有士多啤梨同藍莓既小鮮果，非常fresh。皇牌士多啤梨乳酸梳打，有鮮果酸酸甜甜好好飲，菠蘿梳打亦有果肉，可以幫助消化，十分爽。