八寶清湯腩

營業中

休息中

今日中午約咗阿媽去佢屋企附近嘅將軍澳新都城三期煌宴Brunch，啲嘢差到食唔落，回家途中先落天后食碗牛腩麵頂吓肚先。八寶清湯腩好評，一直係我想去餐廳list 上，決定去試吓佢個崩沙腩麵。約下午三點去到，門口個牌顯示已沽清崩沙腩，OMG 真係好失望再睇原來連坑腩同爽腩都沽清埋，只係剩返普通嘅牛腩算啦一場嚟到，點都要試吓佢咩料。因為我一個人，佢安排咗一個所謂高腳吧枱位俾我，但係枱面好細加上側邊一堆雜物，張凳勁高，雖然我本身唔矮，但坐得都好唔舒服我叫咗一碗普通嘅牛腩麵，之後我見到隔離有一張雙人檯冇人坐，咁我問侍應可唔可以調過去坐，佢指向另一邊有張四人枱，有一個人食緊話要搭枱，我話冇所謂，因為張吧枱位真係好難坐。牛腩麵好快上枱，我先飲一啖個湯底，有一浸藥材味，第一感覺係好似肉骨茶，我本身都幾鍾意飲肉骨茶，所以個湯係好味嘅。再食下佢嘅蘿蔔，有五大舊，好淋又清甜冇渣幼麵質地爽口冇鹼水味牛腩雖然冇咩特別驚喜，但至少唔會好嚡好乾，加上有少許筋牛味幾濃。$58一碗，呢個價錢絕對值得食。下次要早啲嚟試吓佢個崩沙腩先。