釜之魂釜飯專門店 (淘大商場) (已結業)

呢間專賣日本釜飯嘅餐廳好似已經開咗好耐，仲記得之前呢個位係一間吉列豬扒飯專門店，今次晚飯時段喺淘大行完街，醒起呢間餐廳，就決定晚餐喺度解決。餐廳主要係主打釜飯，足足有成十幾款可以選擇，有選擇困難症嘅我都諗咗一陣先揀到。背面仲有小食同甜品可以揀。作為鰻魚愛好者，見到鰻魚諗都唔諗就揀咗佢，一上枱真係嚇咗一下，鰻魚好足料，好肥美，識落啖啖肉好實在，肉質好紮實。旁邊亦都有一啲蔬菜，而底下嘅飯份量原來都好多吓，食到最後會有飯焦，呢個真係幾驚喜。由細到大都好鍾意食番薯，每次到日本都必食，今次見到呢間餐廳有，當然要叫一客。不過呢個就冇乜特別，本身以為佢係好似大學芋，表面係包裹着焦糖，但原來只有小小，如果焦糖更多甜到高啲嘅話，應該會更加好食。另外仲叫咗一客手羽，上枱嗰陣時啱啱炸起，所以食落好脆。最後當然唔少得叫返份甜品啦，其實成餐飯最期待就係呢個黃豆粉蕨餅，呢個同樣都係每次去日本必食，雖然一份份量唔大，但係做飯後甜品，呢個份量就啱啱好。