東京@mytokyo (已結業)

估唔到個食評未寫，佢已經摺咗，點都好，食過都寫寫佢啦！老婆同同事哩過食晏，話唔錯，趁星期六小弟做晏咗，就過哩同老婆食下午茶，下午茶時段2:30-5:45pm，環境較為幽暗，但三幾個哩食嘢傾偈都幾好嘅！食物選擇都幾多款，佢哋有個本月下午茶推介，啱啱係有兩款揀：豚肉生薑燒飯、豬軟骨拉麵（無其他嘢包，只得個飯同麵），我哋費事諗就揀咗依個推介，再加多少少錢要杯凍Mocha。飯市可能幾旺吓，因為2:30pm哩到，好多枱都食完未有人執，而且，明顯人手不足，甚至我哋企咗好幾分鐘先有人招呼入坐。不過，坐低都好似無乜人理咁，因為環境又比較黑，要揚手幾次先搵到個侍應哩落單，一落完單佢又急急腳咁行開咗，應該仲係收拾緊枱面嘢，衰就衰在無乜表情，又無反應，好似行屍走肉咁。下午茶市其實無乜人，所以都唔知點解我哋D嘢要等咁耐！豚肉生薑燒飯，唔得，我只係覺得係一碗洋蔥加埋薑片炒肥豬肉嘅珍珠飯，D豚肉超肥，肥過D整梅菜扣肉嘅豬肉，食完一口油！反而，個豬軟骨拉麵似模似樣，至少奶白湯底有豬骨味，豬軟骨就稍微韌咗少少，拉麵都OK，有彈性！最滿意竟然係杯凍Mocha，夠大杯，夠冰凍，仲夠啡味同朱古力味，哈哈！