宜家家居餐廳及咖啡室

營業中

休息中

上個星期六要去宜家買嘢，順便喺餐廳食晚餐，之前對呢間餐廳嘅印象一般，因為覺得嗰啲食物都係好普通，可能我自己買返屋企煮仲好食過佢好多，但係今次竟然有意外驚喜，就係佢嘅脆豬手啦！結果我哋三個人叫咗兩隻嚟食，因為食過一隻之後好想再食，雖然佢嘅份量都已經唔細，切出嚟嘅肉都好多，不過我哋幾個都係食肉獸，所以就再叫多一隻！第一，佢嘅溫度維持得相當好，雖然我買完都唔係即刻食，因為仲要搵位，但係搵到位之後再食，都唔算話特別涼咗，所以對佢嘅印象已經好好，然之後切開裏面嘅肉質係相當之唔錯，個皮固然係焗得夠脆，裏面嘅肉亦都唔會話乾到冇晒肉汁，十分好食，再加埋酸椰菜，都係我鍾意嘅，伴碟嘅薯仔就真係好普通，可能分開整，所以啲薯仔已經凍晒，根本食唔落，不過有呢隻豬手就夠啦，我另外叫咗個小龍蝦沙律，真係唔會再試啦，因為啲小龍蝦一啲鮮味都冇，我諗同食張紙都冇分別，沙律菜唔算太差，但係份量相當之少，所以對於個沙律係失望嘅。