銘陽車仔麵 (已搬遷) 新店位置

都好似有一排冇食車仔麵，今次去左荃灣試新開冇耐既車仔麵店，聽聞有秘製沙爹醬，好似好吸引，就去試下～環境餐牌菜單有好多選擇揀，唔止粗幼麵，連刀削麵都有。自選四餸一麵　$42揀左沙嗲醬湯底配粗麵，餸就揀左咖喱辣魷魚、炭燒豬頸肉、柱侯牛腩同炸魚皮。沙嗲醬湯底必點！沙嗲醬同麻辣醬都係老闆自己調味，招牌無味精，食完唔口渴，勁濃沙嗲味，仲有小小辣味，問店員仲可以再加沙嗲醬添。而粗麵幾彈牙，又可以掛汁，份量一定夠一個人食。至於咖喱辣魷魚，一向都好惹味，辣魷魚size好粗，咖哩又入味，份量夠多，食車仔麵必點。炭燒豬頸肉好有火喉，炭燒感重。柱侯牛腩同炸魚皮就正正常常。香港實在好多車仔麵小店，今次試既呢間都唔錯，選擇多，醬汁又好食，荃灣食車仔麵又多一選擇。