樸生 (已結業)

今日去青衣探朋友，佢話最近青衣城開左間新韓式餐廳，就提議一齊去試下啦！原來佢分左兩邊，一邊係素食，一邊係部隊鍋加韓食。因為天氣有啲涼，所以我地就揀左部隊鍋啦！首先講下佢個自製鍋飯先！超正！佢個鍋飯係自己先揀想食既鍋飯材料，放落個鍋度，再拎返去燒熱。原來佢個鍋係適合放係火鍋個電池爐上，一陣就會燒慶晒！熱辣辣，焦焦地，撈埋個韓式辣醬食，一流！最欣賞係配料可以自己揀，種類都好多，有粟米、泡菜、牛肉、辣雞肉、紫菜同芽菜。最最最開心係有溫泉蛋！水汪汪的，撈埋落飯食好好味！炸雞任食，雞肉嫩滑，外邊炸到卜卜脆！仲可以自由撈醬，有成十款醬料揀，包括有青檸蜜糖、柚子醬、士多啤梨韓式辣醬等，任均選擇！人蔘雞湯湯底成只雞，湯底有淡淡既人蔘味！食食下發現只雞內有玄機！原來雞入面係有糯米飯！吸晒啲精華，好入味！蔬菜區有蓮藕、冬菇、翠肉瓜同青菜等。部隊鍋有木耳、午餐肉同不同丸類等。甜品區可以自己整棉花糖！幾款味道水果朱古力噴泉芋圓同仙草夠煙韌，唔會太甜，不錯！飲品有水果燒酒、梅酒同柚子茶。除上述自己夾外，套餐包左可任叫黑毛豬、牛肉同雞柳架！食到好飽！好滿足！