MX (中華總商會大廈) (已結業)

食晏放飯食快餐，去咗食MX中環，一心諗住食天使雞扒飯，排隊嗰陣見到有個自由扒餐，塊板可以揀和牛漢堡、雞扒或者豬扒，跟住再揀火腿、腸仔或者午餐肉，之後再揀汁，再加飯或者意粉$46連嘢飲，總共有36個唔同嘅過關組合。最尾我揀咗和牛漢堡配火腿，配紅酒牛肉汁意粉，跟凍奶茶加$3。和牛漢堡比較細塊，但厚厚地幾好咬口，質素同MOS BURGER和牛漢堡差唔多，口感各有不同，紅酒牛肉汁幾好味，總括來講成個餐都唔錯，但如果佢可以好似大快活咁，有多啲菜就再好啲。再簡單介紹下呢間MX，比較特別嘅係佢係有兩層，兩層都係有各自嘅收銀處同廚房，好少見，賣嘅嘢食大部份嘅都一樣，但係有啲係樓下有樓上冇，所以唔趕時間嘅你可以睇下樓上樓下分別有咩食先買。個人比較鍾意坐上層，因為有窗口感覺冇咁侷促。今日去食嘅時候係星期日，成間舖都坐滿菲傭，感覺置身菲律賓，快快食完我就起身。