餃餃餃子 (已結業)

平時鐘意周圍食嘅Mr.A今日帶咗近日愛上宅在家中嘅我來到黃埔餃餃餃子，呢間以日式餃子作為主打嘅餃子店內部裝修簡潔，座位之間都算寬敞，坐得舒服。餐牌中芸芸餃子當中，在於個人口味選擇來講，首先最吸引我嘅，係日本京都九條蔥餃子。記得曾經喺日本試過放上九條蔥嘅拉麵，當時對於其清甜多汁嘅口感印象深刻，估唔到返到來香港，竟然又再次俾我與它再續“未了緣”。此款餃子除咗蔥味芬香嘅九條蔥之外，帶有絲絲蒜香及薑味嘅豬肉餡也香甜多汁，而煎過嘅外皮薄身得來又帶點脆口，整個配合都十分夾。朱古力跟餃子嘅配搭，到底會係有咩特別呢？根據不嬲都鐘意交際嘅Mr.A剛剛成功爭取到少少時間與師傅打下牙骹後得返來嘅可靠情報，原來此店嘅朱古力餃子所使用嘅餃子皮及朱古力均全由日本空運到港，超薄餃子皮加上甜到入心嘅日本朱古力，忍唔住又再追加一份先覺滿足。