八哥主題餐廳 (已結業)

相信大家都一定係網上見過一個八哥慕絲，今日我就特登黎朝聖。一人到去就已經見到好多八哥既裝飾，真係好似同既八哥一齊食緊野咁。 我就叫左個巴馬火腿焗薯蓉，見到個名已經留哂口水，估唔到比想像中更加好。外型好靚，中間既巴馬火腿卷成一朵玫瑰花，好優雅，而且風乾得非常好，香濃又唔會太硬身。而薯蓉整得好好，超幼滑，加埋表面一層燒焦既芝士，好夾好好食。 另外又叫左個卡邦尼意粉，個意粉煮得唔錯，條條都好分明，而且口感好好。醬汁幾特別，芝士味唔算好重，反而係有濃郁既酒香味，加上煙肉碎，好香濃。 最後就緊係今日既主角出場，就係呢個八哥3D朱古力味慕絲配美國芝士蛋糕，係網上見到呢隻八哥，就已經好想食。本身好驚會中伏，同網上既唔同，點知竟然有驚喜。八哥既外型整得好真，甚至連一條條毛都整左出黎，真係完全係一隻細狗仔咁，好得意。特別係八哥既頭，整得好仔細好真，食個下都有少少唔忍心，覺得有少少殘忍。而味道亦幾高質，朱古力慕絲好冰凍，但又保持入口即融既口感，加上朱古力味好濃郁，非常好食。而芝士蛋糕亦唔錯，特別係連埋朱古力慕絲一齊食，特別又意外地夾。