Mansons Lot (已搬遷) 新店位置

星期日一早約好咗朋友仔嚟汕頭街搵食，本身唔係嚟呢間，可惜冇開舖，誤打誤撞幫襯。雖然近排少咗好多人出街食飯，但係呢間餐廳舖頭細細都有8成滿，相信有一半係熟客。雖然坐位距離比較近，但感覺都舒服。餐牌款式都唔少，是日我㨂咗個牛肉闊麵，朋友就選擇咗魚柳意大利飯。牛肉闊麵睇落好似細細件，相信係片裝芝士喺個闊麵面，啱啱好覆蓋晒個闊麵，牛肉碎份量都唔少，味道平均，伴碟有沙律菜配上黑醋，食落份量對女士嚟講就真係好足夠。魚柳意大利飯，份量十足，魚柳件大大件，厚得嚟嫩滑，飯嘅口感軟硬度適中。加杯Long Black，咖啡味香，濃淡度啱啱好，冇酸味，一杯真係唔夠喉。當日我倆傾到唔知時間，只知客如輪轉，亦有滿坐嘅時候。雖然我哋兩個原來都傾咗大概都有2個鐘，不過服務員們都有為我哋添水，感覺良好。