紫荊閣海鮮酒家 (已結業)

小女子奀奀地的人工有幸加了少少, 阿媽在這兒卜了枱宴請一班姨媽姑爹。若干年前好像也來過, 不過那時似乎只是普通酒樓一間, 現時人氣旺盛是因為電視節目的威力囉, 阿媽都是睇電視才識來食懷舊菜的。鴨腳包- 用鵝腸包著鴨掌、鵝腸、叉燒、雞肝等材料，然後加上特製叉燒醬醃製，再拿去燒; 此味是很多年前燒味鋪很流行的加餸菜式, 但由於功夫太多所以如今已是絕無僅有的了。經過早前電視介紹過後, 變成此店的招牌菜。富貴龍鳳球- 一味雞蝦配, 再配以沙拉醬。中間還夾有雞肝, 係幾有特色的一道菜。芝麻斑–都幾難唔好食啦。花膠筒扒時蔬–花膠筒即是筒形的花膠, 呢味咁多骨膠原的梗係受女士歡迎。雙菇扒時蔬–正正常常咁啦。清宮御廚雞–此物和另一名菜八寶鴨都是要預訂的, 席上有人不吃鴨就要了這個。它是將糯米釀進原隻去骨的雞內再蒸/炸, 又係一道功夫菜, 不過糯米乾身一點較好。潮式排骨–即是風沙排骨啦, 略鹹。例湯–粉葛鯪魚煲赤小豆: 這個可是添食之作呢, 要了兩煲。可惜是晚焗魚腸沽清, 緣慳一面。8 個人食了約$1600, 咁抵, 請都請得高興也。