地道館麵軒

營業中

休息中

一間好貼地嘅小店，絕對冇咩環境可言，一眼望哂成個鋪位，仲可以睇埋廚房位置，都係似做街坊生意。另外一提有隱藏餐牌，因為眼見好多人食嘅野都唔係餐牌有提供，應該要專登問佢。🍜酸辣米線★★★☆☆叫左小辣，湯底幾油，啲油係哂碗野面頭，影完相佢都好似有啲瓊瓊地。雖然落好深色水又多紅油，但食落唔係好辣，但湯底係真重口味，偏咸同酸。碗麵有埋芽菜、肉碎，米線偏向幼身溜，有啲似麵線咁，同埋都幾吸湯底入味，就咁夾一住米線食都夠味道。餸方面叫左豬紅同豬腸，豬紅口感唔錯滑爽，但太咸，豬腸都唔錯，冇怪味之類。但成個麵份量都比較少，女仔食完都冇話飽嘅感覺，同埋都幾口渴，絕對有味精。🍜清湯米線★★★☆☆雖然清湯，但個湯底顏色好都深下，連米線都可以變埋啡啡地色，好吸湯底。湯底食落係咸咸地，似係醬油汁。餸方面叫左蘿蔔、豬皮、魚皮餃，魚皮餃冇咩特別同街市一盒個啲，但少左啲得2粒，蘿蔔夠淋同清甜，豬皮個口感有啲同平時食開嘅唔同，唔算係爽口，但似煙韌，同埋食落係辣既。🌟總括：試過便好，此終個湯底太重口味，未必個個人受得住，加上葵廣大把唔同鋪頭小食，未必要簡佢黎食。