三河屋 (已結業)

農曆新年前最多開倉清貨，今次放工來了紅磡這邊掃貨。之後要食野補充返，上開飯見到三河屋風評不錯又抵食，梗係要試吓！如果只看門面，我估普通行過都未必會入去食。 一間小小的食店，無論門面還是內部也感覺出是老舖。貼在牆上的menu及裝飾也已經泛黃，很有年代感。雖然沒有壽司(不過有刺身)，但有其他很多在香港坊間也未必有的選擇，例如漬物、關東煮、大阪燒等，這間小店都應有盡有。我同朋友叫咗三文魚刺身、關東全煮、咖喱吉列豬扒飯同鰻魚飯。三文魚刺身以68蚊來說，份量不少，鮮甜肥美。最特別係用咗昆布碎放在三文魚底，不是一般的蘿蔔絲和紫蘇葉。 昆布食落少少咸咸地，都幾得意。關東全煮內有7樣食物，分別是雞蛋、蘿蔔、獅子狗、芋絲、蒟蒻 (木薯糕)、淮山卷和鯊魚蛋，碗邊放了少少黃芥辣。蘿蔔入哂味好食；個鯊魚蛋非常淋，都幾特別。其他就正正常常。個湯就覺得普通，甜豉油太重，偏咸，好在無點影響裏面食物的味道。咖喱吉列豬扒飯好大份，滿滿的咖喱覆蓋了大半隻碟，賣相吸引。味道方面是甜咖喱唔辣。豬扒雖然不算好juicy但都唔算乾。成個飯總算唔錯。鰻魚飯d鰻魚有兩大舊，而且都幾肥美，頭尾燒得脆脆地，如果成條都有呢個效果一定更正。