糕點時光 (已結業)

主打由金齡媽媽手製嘅傳統中式糕點，當中加入不少創新元素，舊糕新做，將糕點帶嚟新形象年輕化，一改老土印象，但同時保留番兒時回憶嘅味道。除咗糕點同懷舊零食之外，仲新推出咗DIY材料包，可以買返去自己落手整，有晒教學短片，唔洗擔心會失敗。流心芝麻卷 ($20)附上一支小小特濃芝麻漿，用滴管將芝麻漿分別唧入芝麻卷嘅每一層，令芝麻漿充分融入到芝麻卷，做出流心效果，風味厚實而濃郁。黃金甘栗南瓜糕 ($30)南瓜糕上啖啖綿密，味道香甜，仲食到南瓜蓉同栗子粒，用料十足。抹茶紅豆椰汁糕 ($20)口感軟滑，紅豆香甜起沙，有陣陣抹茶甘香。糯米糍 ($20/粒)有5款口味：傅統香甜花生丶髒髒朱古力曲奇丶小山園抹茶紅豆丶特濃黑芝麻丶焙茶甘栗。粒粒皮薄餡多，口感軟糯煙韌，餡料十足，使用天然甜菊糖，零卡無甜無麩質，食得健康零負擔。