緣聚鮮鍋 (已結業)

荃灣不嬲都係多嘢食嘅地方，今次特登嚟到緣聚鮮鍋食期待已久嘅任食打邊爐！一入舖頭，就已經發現餐廳非常之大，係我食過最大嘅打邊爐店舖！成間舖頭有超大corner 做沙律bar、壽司bar，另一邊就放咗甜品同大量飲料。值得一讚嘅係餐廳提供嘅飲料數目係非常之多，包括各款嘅汽水、紙包飲品、茶，更加有生啤（好好飲）、清酒、梅酒，真係諗咩有咩飲！坐低咗之後，我哋揀咗鴛鴦鍋，一邊係鴨血麻辣鍋，另外一邊係豬骨湯。鴨血非常之出色，而麻辣鍋嘅辣度真係唔講得笑，就算放粟米落去，都已經非常之辣，真係誠意十足！喜歡食辣嘅朋友一定要試吓啦！而豬骨湯底就係相對遜色，但勝在可以中和返辣度。海鮮嘅材料尚算可以，蝦同埋蠔會比較出色。而肉類就以西班牙梅頭肉嘅質感最好，牛肉亦新鮮，打邊爐必選！另外真心推介麻糬、芋香鴛鴦薯，有口感得來又好食，值得encore啊！甜品嘅話，推介yogurt 加彩色嘅夾糖，仲可以加上朱古力醬，非常之特別啊！