美味故事 (已結業)

美味故事臨晚市停堂食前同朋友出去食個西餐，呢間樓上餐廳日式裝修，環境唔錯，有塌塌米座位而且其他座位都闊落。我地二人點左個一人餐加個主食，餐湯蘑菇湯同南瓜湯都好濃郁又creamy。我地揀左煙三文魚薯仔蛋沙津配泡菜豆腐餅，味道都幾好，豆腐餅較軟身亦唔辣。好快主菜都上台了，西京燒三文魚扒（香草忌廉汁）配肉醬意粉，三文魚煎到表皮香口，裏面既肉唔腥又帶有油脂感配少少檸檬汁解膩又提鮮，肉醬意粉味道剛剛好唔太油膩。仲有個慢煮西班牙黑毛豬胺配肉桂蘋果醬及焗薯蔬，黑毛豬煮得剛剛好，入面既肉呈粉紅色，食落唔會好柴，點埋個蘋果醬甜甜酸酸非常之夾。不過個黑毛豬偏肥，較多脂肪位有少少油膩。整體而言，食物都高質上菜快，坐得舒服，值得推薦。