Home Sweet Home (已結業)

係openrice見到好多好評，而且比佢個名吸引，感覺甜蜜又夠住家，所以黎試下。呢間餐廳好近太子港鐵站，大概行3分鐘左右，地點夠晒方便，我呢啲路痴都唔怕搵唔到路。餐廳有好多食物可以選擇，如果有選擇困難症嘅朋友可以直接選擇set dinner，包三款前菜、主菜、飲品同甜品。我叫咗澳洲和牛牛柳拼芝士烤波士頓龍蝦同玫瑰荔枝蜜，男朋友叫咗個龍蝦濃汁海鮮意大利飯加洛神花蘋果蜜。先講下飲品，配搭得非常好，唔會太甜之餘仲有清新嘅感覺，仲有值得一讚嘅係佢用不鏽鋼飲管，好環保啊！前菜份量一啖一件，最鍾意係龍蝦菠菜湯，兩者好夾，仲有好豐富嘅龍蝦味。到主菜啦，澳洲和牛牛柳果然名不虛傳，每一啖都好有牛味，仲有好多嘅肉汁。焗龍蝦仲正，睇相都見到隻龍蝦有幾大，啖啖肉，肉質鮮嫩而且有咬口😋男朋友個意大利飯都唔錯，仲配有煎魚同虎蝦，有好多海鮮，好抵食！食物水準高，餐廳服務態度好，最正嘅係環境一流，係拍拖談心嘅好地方！