原藝 (已搬遷) 新店位置

由朋友介紹，呢間法國餐廳開業冇耐，仲係試業階段，就決定同男朋友嚟試下。小妹預早幾日去打電話落booking，因為上facebook 睇過佢地page 嘅相，主打好似牛肉類，所以booking 過程中都有問除左牛類之外有冇其他推介。接電話嘅女待應好好人，解釋話其實佢地主要係串燒燒烤，除左牛之外都仲有雞、羊、海鮮等等。如果我地有其他需要，甚至可以係booking中落定order，佢地大廚會盡量安排。到去試食當日，”原藝” 都幾近太子地鐵站，由太子地鐵站D出口一出轉右，過條馬路到汝洲街，再沿住汝洲街直行到界限街就到。由附近嘅地產鋪同附近酒吧嘅霓虹招牌襯托下，餐廳黑配啡嘅外觀加上柔和嘅燈光，別具一格，好有”鬧市中的一點寧靜”嘅感覺。 “原藝” 係小鋪經營，座位唔多，以吧檯代替一般餐廳嘅四方檯，可以同大廚面對面交流，個人而言，小妹非常喜歡呢種格局。客人可以即席欣賞大廚嘅廚藝同時，廚師又可以即時睇到客人品嚐後嘅反應。 入到餐廳坐低，侍應小姐（人如其聲，笑容好甜）好友善咁問要凍水定熱水，小妹同男朋友都話冇所謂，不過個日男朋友著衫比較厚，有少少熱到流汗，侍應小姐都好細心俾左凍水我地降溫，呢點值得一讚。