永華日常 (淘大商場1期) (已結業)

睇舖名差啲會錯意係賣黯然銷魂飯啲friend，普通茶記之流，加上見星期日晚6點幾仲係冇乜食客就差啲卻步。睇真啲見佢都裝修得靚靚仔仔，又多梳化卡位，新開冇耐咁滯，諗住至少唔啱食都啱睇……餐牌都唔流於一般茶記嘢食，叫有啲特別搞作（見圖），有wifi供應方便手機落單。腐乳臘腸fusion意粉都唔係咩新鮮感，稍為亮眼係用老字號廖孖記，底汁已混左腐乳汁，再放粒方糖大細嘅腐乳喺面，撈唔撈勻自己揀，同埋唔會鹹到要清水洗脷。不過如果臘腸再切碎啲再加啲雞脾菇之類嘅菌類索吓汁會再圓滿啲。咖喱雞飯係中間中上交界水平，食唔到辣都覺得唔辣，係欠左啲椰奶香，飯兩三碗啱佬食嘅份量，就係汁偏少。最後嗌咗碗合桃糊潤番吓，雖然冇合桃碎咬口，但夠香又磨得夠滑夠柔潤，拿拿聲歎完。地方方便傾吹水，會翻叮。