Nunu燒 (已搬遷) 新店位置

近月週二晚喺老蘭多咗個舞場，不過九點就開波，XO仔一OT親晚飯即變得好趕，好似今個禮拜咁就只有半個幾鐘頭剩，所以就應舞友推介，喺附近一家串燒屋「Nunu燒」度食簡單啲，務求快速搞掂。小店一眼望哂，右方為廚房及吧位。左邊則為要搭枱式o既散座，全配上圓櫈仔。桌上擺有餐牌及自助餐具。小肥一枝公黎食，不用費神即諗好食兩款串燒加一客炸蠔。雖然未有點得太多食物，但樓面位哥哥仍極之客氣友善，個人覺得相當難得！廣島吉列蠔（$40/兩隻）：炸至金黃o既廣島吉列蠔皮層鬆化香脆，蠔隻不單熱辣辣，咬落更加係肥美嫩滑，鮮甜美味，而且仲爆哂汁添，！安格斯牛（$110/兩本）：半生熟o既串燒安格斯牛鬆軟多汁，惹味非常。軟骨雞棒（$80/兩本）：最精彩必選壓軸上場碟軟骨雞肉棒。隨兩串棒棒有一小碟碎蔥七味粉生雞蛋秘醬。細佬最愛攪野，當然係邊攪蛋黃鮮黃o既醬汁邊拍照留念啦！食軟骨雞肉棒前先黏上蛋黃秘醬。嘩，混入軟骨製成o既雞肉棒幼嫩得黎卜卜脆，外層被蛋黃秘醬包圍即倍添香滑，冇得頂呀！感激舞友好介紹，令XO仔可以舞前於老蘭「Nunu燒」快速輕食日式串燒小食作晚餐，善用時間又有好野食，仲要免收加一喎，掂呀！