小念頭 (通菜街) (已搬遷) 新店位置

呢一間小店位於旺角鬧市小巷入邊，要入去嘅時候需要撳鐘，大廈閘門就會打開。一入到去已經見到好清新嘅一個環境，由米白色同埋黃色做主色，配左唔同嘅綠色植物，令人覺得去咗另一個地方。老闆娘同我地介紹呢一度係自由選擇座位，另外有新鮮做嘅蛋糕，熱食同埋茶點。特別要推介一個好似忌廉溝鮮奶嘅冷茶，飲落去甜甜地又唔會油膩，清新到不得了。另外熱食方面佢嘅選擇雖然唔多但係全部都好有特色，我哋叫咗韓國辣腸配pancake ，佢唔單止鬆軟，甜甜地鹹鹹地加起來十分之好食，我同朋友都覺得佢哋應該整一啲晚餐午餐set，因為咁好食嘅嘢細細碟真係唔夠食熱茶方便佢哋會有一個回沖嘅服務，你可以同朋友一齊分享一壼熱茶，茶味十分之香濃，配合成個環境真係好舒服。最令我期待就係佢每日都會有唔同款式嘅蛋糕，我最鍾意嘅就係泰式奶茶戚風蛋糕，好多時候食海綿蛋糕都會覺得太乾，但係呢個蛋糕濕潤度十足，奶茶鋪面嘅份量絕對會夠你食晒成個蛋糕，而且佢雖然大，但食完完全唔會有飽飽滯滯嘅感覺。見到佢星期六日都算旺，旺角呢啲特色小店真係唔算多，大家都要多多支持香港嘅小店文化！