潮州人 (已搬遷) 新店位置

太子出名有好多好嘢食，有次經過一間好細嘅舖頭，俾佢門口嘅有良心裝飾吸引咗，而且我好鍾意食花膠，對皮膚好啊嘛，咁就入去支持下啦。我哋兩人叫咗一個花膠撈米，花雕醉雞翼同蠔仔米，仲叫多咗支龍眼花旗參蜜飲。先講雞翼啦，都叫做醉得好夠味，同時酒味又唔會過濃，做得都幾唔錯。龍眼花旗蔘蜜都做得幾好，唔算太甜，甘甘地都幾解渴。因為想試吓其他嘢所以嗌左蠔仔米，個湯清清地，啲蠔都幾好食，正正常常啦。花膠撈米舊花膠好大舊，而且炆得好入味，每一啖都感受到滿滿嘅骨膠原，正呀，個汁醬都唔算太鹹，用嚟撈米粉啱啱好，每一啖都將住個口，唔錯唔錯。不過其實價錢都唔算太平，我諗係因為小本經營，不過唔緊要啦，良心冇價呀嘛！